400+ ka aankda

mere dvara padhe gaye vibhinn sroton jaise patrikaon, planners, internet sites aadi me kaheen bhee mukhya pariksha ke vibhinn patro me prapt kee ja sakne walee ankon kee adhiktam seema ke bare me koi baat nahee paee gaee. coaching shikchakon ke saath saath safal pratiyogee bhee is sambhandh me maun hain. agar kaheen koi baat hai bhee to vo ateet me kisi vishay me prapt ankon ke jikra tak seemit hai. kaheen bhee koi is vishay par charcha nahee karta ki kisee patr me prapt kee ja sakne walee ankon kee adhikta seema kee kya sambhavnaen ho saktee hain . main is sambandh me apne vicharon ko likhne ki koshish kar raha hoon :

(1)-pichle kuch varshon me mere dvara dekhe gaye 400 se adhikt ank 435,427, 419, 418, 417, 413 aadi rahe jo mechanicle engg, electrical engg, ganit, darshanshastra , chikitsa vigyan, jeev vigyan, manovigyan aur vaadijya aadi vishyon me rahe.
(2)-in vishayo me sarvadhik prachlit vishyon ke naam najar nahee aate hai jaise lokprashashan, samajshastra, itihaas, bhugol aadi.
(3)-400+ ka ankdaa par karne wale vishyon me vigyan ke vishay agraganya hai.
(4)-mere dvara jane gaye sarvadhik yog me se ek 427 (ganit, cse 2009, rank 2) hai jabki pratiyogee ka sahi hal kiye gaye prashno ke anko ka kul yog 585/600 tha.
(5)-yadi yah parinaam ek pratiyogee ke liye satya hai to kisee bhee pratiyogee ke liye satya ho sakta hai basharte vah pure prashna patra ko preekshak kee apekshao ke anuroop sahee hal kar sake.
(6)-is prakaar in parinamo se ek vishay me kam se kam 70%(420/600) ke aankde ko prapt karne kee sambhavnaa satya prateet hotee hai aur yadi yah ek vishay ke liye satya hai to kisee bhee vishay ke liye satya hai.
(7)-vigyaan vishyon ki vastunisth prakriti k karan najariye par aadharit uttar nahee dene hote jo ki manveey vishyo me kam anko ka ek kasran banta hai parantu vigyan vishyon ka pathyakram manveey vishyon se bada hota hai , vishay ka gyan na hone par kuch bhee likhna asambhav hota hai aur adhik parishram kee aavshyaktaa hotee hai. Arthat dono vargo ke sath koi na koi samsya judee hui hai , ab kiska samna kiya jae iska faisla vyaktigat chamtaon ke sahee anklan ke aadhar par hona chahiye.
(8)-yahan manveey vishyo me kam anko kee praptee ke sambandh me kuch aur bhi kaaran ginaye ja sakte hai jaise adhyan saamagree ka abhav, samsamyiki se sambandhit pathyakram aadi lekin pratek samsya ka samaadhan sambhav hai , isse koi inkar nahee kar sakta aur adhiktam anko kee seema ko prapt karne ke liye kisee samsya ka bahana nahi banaya ja sakta.
(9)-is prakar kisi vishay me prapt anko se adhiktam anko kee seema (70%) kee tulna karke ye jana ja sakta hai ki hum kitne anko ko nahee prapt kar sake. Iskaa kaaran gyaan kee kamee ke sath sath sahee prastuteekaran aur samay prabandhan ke abhyaas kee kamee bhee ho sakta hai.
(10)-chuki is pariksha me pratyek vishay ko ek barabar mahatv prapt hai jiske liye scaling paddhati ka upyog kiya jata hai. aise me manveey vishyon me vastunisthta ke star ko badhakar vigyan vishyon jaise ank prapt kiye ja sakte hain.
(11)-manveey varg ke kai vishyon me pratiyogiyon ne keval ek patra me kai baar 200 ka aankda paar kiya hai parantu aisa dono patro me bahut kam pratiyogiyon dvara kiya gaya hai isliye ye ek galat dharna ban gai hai k manveey vishyon me vigyan vishyon k saman uchch ank nahi prapt kiye ja sakte hai.
(12)-kul mila kar yah kaha ja sakta hai k uchch anko ki kunji vistrat, gahre, tulnatmak vastunisth gyan k sath vaigyanik prastutikaran par samay prabandhan ki dakshta me chupi hai.

Advertisements

PRARAMBHIK PARIKSHA 2012 : MERA ANUBHAV AUR GALTIYAN

do baten mahatvpurn lag rahi hai jinhe batna chahta hun, sayad kisi ko kisi rup me labh mil sake.

hum is pariksha ki anischit prakriti k bare me aksar sunte aur padhte hai lekin kam se kam prarambhik pariksha me kafi had tak prashno k sambhandhit vishyon aur chetron ka anumaan lagaya ja sakta hai. iske liye pichle sal ke prashn patr aur usse nikle anumaan vishesh mahatv purn rahe. udahran k taur par pratek patr me alag alag bhago se puche gaye prashno ki sankhya, kuch vishesh bhago ka adhik aur kam mahatv , avdharnatmak prashno ki adhiktam sambhavna aadi. anna andolan k karan gandhi se jude prashno ki puri sambhavna thi aur kam se kam teen prashn puche b gaye. ye udahran hai kis tarah samsamyik mahatv ki ghatnao par pathyakram se sambandhit prashn puche ja sakte hai aur ye trend main exam ke sath sath prarambhik pariksha me bhi aarambh ho chuka hai.

dwatiya patr ki taiyari k liye doosre abhyartiyon k viprit maine koi adhyan samagri nahi kharidi thi. pichle varsh k prashn patr ko dekh k mujhe ummeed thi k mental ability, reasoning aur maths k prashno ki sankhya 10% k andar hi rahegi aur unme se kuch ko main bina taiyari k hal kar sakta tha. aisi hi sthiti angreji aur aptitude k sath b thi jinke prashno ka star atyant sadharan hone k karan kisi vishesh taiyari ki aavshyakta nahi thi. is tarah mere anumaan prashn patra samne aane k bad sahi sabit hue aur prashn patr k prashno ki prakriti aur chetr ummeed k anukool rahe.ye baten prarambhik pariksha k prashno aur unke chetron ka kuch had tak andaja lagane ki sachchai ko jahir karti hai. yadi aisa ek pratiyogi kar sakta hai to koi b kar sakta hai. aavshyakta sirf pichle prashn patro aur nai prvrattiyon k aadhar par badalte trend ko samajhne ki hai.

in baton k sath doosri mahatvpurn bat meri abhyas k prati laparvahi ki badi galti ki hai. aur ye laparvahi mere liye bahut bhari sabit hui kyuke aise kai prashn chut gaye jo ya to aate the ya anumaan se hal kiye ja sakte the. mera samay prabandhan bahut kharab raha . is pariksha ki taiyari ek lambi daud ki tarah hai aur aise me meri jaisi galti swayam k prati apradh hi mani jayegi. kul mila kar jo mene samjha, pratek abhyarti ko kisi galatfahmi me na rah kar aur ati atm vishvash se bachte hue abhyas ko mahatv dena chaiye anytha asaflta ka karan gyan ki kami nahi abhyas ki kami banegi. abhas prarambhik pariksha k liye b utna hi mahatv purn hai jitna k mukhya pariksha k liye. jinhe is tarah ki pariksha ka anubhav nahi hai unke liye to abhyas anivary hai. yah kahne ki aavshyakta nahi k abhyas humare mastisk ko pariksha k mahaul aur prashno ki prakriti k anukool bana kar safalta ki sambhavnaon ko kai guna badha deta hai.

Dosre patra se juri ek aur galti hui, asan hisso, prashno, vishyon aur pathon ko adhik mahatv dena jo k meri ranniti ka hissa tha lekin jiska paalan karne me safal nahi raha aur iska kaaran aasan hisso ko halke me lene ki aadat. Hum sabhi jante hain k doosra prashn patr, pratham ki apeksha kafi saral hota hai. aise me iski achchi taiyari karke safalta ko sunischit kiya ja sakta hai. Yahan tak ki doosre patra ki achchi taiyari hone par pratham patra ki ausat taiyari se b safalta sunischit ho sakti hai. lekin mene sirf pratham patr par dhyan diya aur doosre patr ko halke me liya, natija abhyas ki kami se me dono hi patron me ummeed k anusar pradarshan nahi kar saka. Isliye is bat ko bhi mahatv dene ki aavashyakta hai k aasan bhagon ki taiyari pahle ki jae aur fir any hisson par dhyan diya jae. Ek chatur abhyarti ki koshish honi chaiye k doosre patr me 100% prashno ko sahi hal prapt kiye jaen. Yadi aisa kar liya jaye to sirf doosre patr k 200 ankon se safalta sunischit ho jaegi. parantu yah kafi muskil lakshya hai jiske bare me pahle se nischint nahi hua ja sakta isliye pratham patra ki taiyari ko kabhi b najarandaaj nahi karna chaiye.

uprokt mere niji vichar hai na k koi salaah isliye kisi b vichar ko swam ki jimmedari par hi apnaye.

FORUMS/COMMUNITIES

(1) – indianofficer.com
(2)- forumias.com
(3)- orkut.com

BLOGGING : SAMAJHDAARI YA NADANI

koi abhyarti kyo blogging ki suruat karta hai???

1-dusron ki najron me pratistha pane k liye
2-duron ki madad karne aur margdarshan dene k liye
3-hobby k rup me
4-abhivyakti ki ichcha k karan

ya koi any vajah b ho sakti hai. maine aise kai blog dekhe hai jo suruaat se jyada aage nahi badh pate , kyonke unke pas kahne ko kuch vishesh hota hi nahi hai. isse inkar nahi kiya ja sakta k jyadar abhyarti pratistha ko pane k liye aisa karte hai. aur yahi bat mujhe khatarnak lagti hai k kahin anjane me vo apne liye asafalta ka ek karan to paida nahi kar rahen hai???? nimn binduyon par gaur farmayen:

1-jyadatar gunvattayukt blog safal abhartiyon k hi kyon hote hain??
2-safal abhyarti blogging ki suruat apne lakshya ko pane k bad hi kyu karte hain??
3-posts ya lekhon ka vishay keval margdarshan tak hi kyu simit rahta hai?? aur samsamayiki (current affair) ko hath kyon nahi lagate hain??

kyonke bina anubhav k vishay ki puri samajh ka vikas nahi hota hai isliye kahne ko kuch vishesh nahi hota hai. dusra samsamayiki par likhna bahut samay khapane wala kam hota hai . nimn binduon par gaur farmaen:

(1)- jab abhyarti swayam k liye notes banane k liye b samay ka abhav mahsoos karte hai to samsamayiki jaise seema rahit vishay par blogging karna avyavharik ho jata hai aur swayam ki asafalta ka nischit karan ban sakta hai.
(2)- jab angreji madhyam k liye internet ki suvidhayen sabhi k liye saman roop se uplabdh hai to usi jankari ko apne blog me copy paste karke dena arthheen ho jata hai. aur ye arthpurn tabhi ho sakta hai jab doosre abhyartiyon ki samasyaon ka samadhan kare ya unki doosre kai sroto ki nirbharta ko ek srot par nirbharta me parivartit kare, jo k asambhav kary hai.
(3)- kisi b abhyarti ka blog wikipedia, newspaper, any upyogi sites aur magazines ki jagah nahi le sakta aur yadi aisa karne ka mahan prayatn kiya b jae to cse ki taiyari karna asambhav ho jaega.
(4)-jin blogs ki madad ek gambhir abhyarti taiyari k liye leta hai unke lekhak apne chetra me 20/30/40 saalo ka anubhav rakhne wale vidwan hote hai. kya ek naya abhyarti unke gyan aur samajh se behtar gyan aur samajh ka pradarshan kar sakta hai???
(5)- naye abhyarti ko to kai bar cse ki taiyari ki seemaon ki samajh b nahi hoti aise me seema k bahar bah jane ki sambhavna hamesha bani rahti hai joki samay ki badi barbadi sabit ho sakti hai.
(6)- ek gambhir abhyarti uchch gunvattayukt prathmik sroto k sthan par adhe adhure, trutipurn aur nimn gunvattayukt yukt copy paste work ko pradarshit karne wale blog par bharosa karne ki murkhta kyu karega??? jyada se jyada utsuktavash 2-3 bar check karke chor dega. lekin isse us blog ko koi arth prapt nahi hoga.
(7)- yadi ise notes banane ki prakriya k taur par liya jae to b uchit nahi hai kyonke har ek ko apne notes swayam banane chaiye aur do abhyartiyon k notes ek jaise nahi hote aise me us blog ka doosron k liye koi arth nahi rah jata.
(8)- gunvatta badhane ki koshish me anusandhan(research) karne lagne ki puri sambhavna rahti hai jo anavashyak hai aur bahut samay barbad karti hai.
(9)- doosron ki madad karne se pahle khud ki madad karna jyada jaroori hai. anyatha ant me asafalta me koi sajhidar nahi hoga.
(10)-toppers koi professional blogger nahi hote hai aur na hi aisa banna unka maksad hota hai, unki bhavna sirf doosron ki madad karne ki hoti hai aur blog likhna iska ek asan tarika hai lekin jab koi gs ya samsamayiki par blog likhne ki koshish karta hai to use professional blogger ka role play karna padta hai jo k kafi samay mangta hai aur cse ki taiyari ko nakaratmak rup se prabhavit karta hai.

mukhya bat kisi prayas k arthpurn hone ki hai tabhi usko aadar aur mahatv milta hai lekin ek abhyarti ka GS ya samsamyik vishyon par blog likhna , samay barbad karne wali kai galtiyon me se ek pratit hoti hai.

yadi koi sirf hobby k taur par current affair k vishyon par seemit roop se blog likhta hai to b ese arthpurn nahi kaha ja sakta kyunki isse kisi ko kisi b rup me labh nahi prapt hota.

kuch samay bad abhyarti ko in baton ka ahsas hota hai lekin tab tak kafi samay barbad ho chuka hota hai jo k vishesh mahatv purn hai. samajhdari isi me hai k samsamayiki jaise vishay par blog likhne se bacha jae aur samay ka sadupyog kiya jae anyatha chand tarifon k bad prapt hone wali asafalta me koi aur sajhidaar nahi hoga. sath hi samsamayiki se alag kisi vishay par suvidha aur samay k anusar blog likhne me koi hani nahi hai. yadi civil seva se sambhandit vishay par hi blog likhne ki ichcha ho to aise vishyon par likhna chaiye jis par ya to margdarshan ka abhav ho ya samagri ka. aise prayas ko arth aur pratistha dono prapt ho jaengi.

WIKIPEDIA KA SACH

दुनिया के सबसे बड़े ऑनलाइन संदर्भकोष विकीपीडिया की लोकप्रियता काफी बढ़ चुकी है। अब न केवल विद्यार्थी, बल्कि मीडियाकर्मी और शैक्षिक जगत के लोग भी विकीपीडिया का खासा इस्तेमाल कर रहे हैं। विकीपीडिया की लोकप्रियता की वजह से दुनिया के सबसे मशहूर एनसाइक्लोपीडिया ब्रिटेनिका का प्रिंट संस्करण हाल में बंद कर दिया गया। 244 साल पहले शुरू हुआ ब्रिटेनिका सबसे प्रामाणिक संदर्भकोश के रूप में विख्यात है, लेकिन विकीपीडिया के सामने ब्रिटेनिका को भी घुटने टेकने पड़े हैं। अब ब्रिटेनिका वेब पर एनसाइक्लोपीडिया विकसित करेगी, लेकिन बात ब्रिटेनिका की नहीं विकीपीडिया की है, जिसकी विश्वसनीयता एक बार फिर सवालों के घेरे में है। पेन स्टेट विश्वविद्यालय के सहायक प्रोफेसर मारिका डब्लू डिसटासो के ताजा अध्ययन में कहा गया है कि विकीपीडिया पर मौजूद हर दस में से छह लेखों में अशुद्धियां हैं। यह सभी जानते हैं कि विकीपीडिया को स्वयंसेवक अपडेट करते हैं, लेकिन हाल के साल में विकीपीडिया ने अपनी साख बनाने के लिए कई ऐसे लोगों को नियुक्त किया है जो अशुद्धियों को दूर करने का काम करते हैं। विकीपीडिया का दावा भी है कि आप अशुद्धियों के बारे में बताकर उन्हें दूर करा सकते हैं, लेकिन शोध में कहा गया है कि ऐसा है नहीं। अध्ययन के दौरान किए एक सर्वे के मुताबिक जब विकीपीडिया के टॉक पेज के जरिए अशुद्धियां दुरुस्त करने की कोशिश हुई तो नतीजा बहुत उत्साहजनक नहीं रहा। 40 फीसदी लोगों को विकीपीडिया के संपादकों की तरफ से प्रतिक्रिया मिलने में एक दिन से ज्यादा का समय लगा जबकि 12 फीसदी को एक हफ्ते से ज्यादा का वक्त लगा। खास बात यह कि 25 फीसदी शिकायतों के संदर्भ में तो कोई प्रतिक्रिया ही नहीं मिली। इस अध्ययन के मुताबिक 60 फीसदी कंपनियों के पेजों पर उनके अथवा उनसे जुड़े ग्राहकों के बारे में तथ्यात्मक रूप से गलत जानकारी है। विकीपीडिया में अशुद्धियों की बात चिंताजनक इसलिए है, क्योंकि अब लोग इसे प्रामाणिक मानने लगे हैं। यह अध्ययन तो मूलत: अंग्रेजी पेजों को लेकर हुआ है। हिंदी व अन्य दूसरी भाषाओं में तो हाल और बुरा होगा। सूचना तकनीक से संबंध रखने वाले उत्कर्षराज ने कुछ दिनों पहले हिंदी विकीपीडिया के संबंध में एक दिलचस्प अध्ययन किया था। उनकी मानें तो विकीपीडिया पर संपादन करते वक्त उत्तराखंड के गांव श्रेणी में उन्हें 9450 लेख मिले, लेकिन इस श्रेणी के लगभग सभी पेजों में दर्ज जानकारी समान थी। गांव का नाम बदल दिया गया और फिर पूरी जानकारी उत्तराखंड राज्य की परोस दी गई। यहां तक कि भौगोलिक स्थिति और मानचित्र भी नहीं बदले गए। ऐसा हिंदी विकीपीडिया पर कई विषयों के मामले में दिखता है। कई पेजों पर शुरुआती दो पंक्तियां हिंदी में दर्ज कर बाकी जानकारी अंग्रेजी के पेज से उठाकर चस्पां कर दी गई है। विषयों को श्रेणीबद्ध करने में भयंकर गड़बडझाला है। एक मुख्य विषय के कई द्वितीयक पेज बना दिए गए हैं। इसका मतलब यह कि हिंदी विकीपीडिया को अपडेट करने वाले लोग प्रशिक्षित नहीं हैं। एक अन्य उदाहरण 13 जुलाई के मुंबई हमले के वक्त का है। उस दिन कई चैनलों पर खबर आई कि आतंकवादियों ने कसाब के जन्मदिन पर हमला किया। दरअसल चैनलों ने कसाब के जन्मदिन की जानकारी विकीपीडिया से ली। विकीपीडिया पर किसी शख्स ने कसाब की दर्ज जन्मतिथि में बदलाव कर दिया था। ऐसे कई दूसरे उदाहरण भी हैं और ये इस तरफ इशारा करते हैं कि ऑनलाइन इनसाइक्लोपीडिया विकीपीडिया एक औपचारिक संदर्भकोष का स्थान फिलहाल नहीं ले सकता, क्योंकि इसके कार्य करने के तरीके में गड़बडि़यां लाजिमी हैं। कई बार कुछ शरारती लोग जानबूझकर विकीपीडिया में गलत सूचनाएं डाल देते हैं तो कई बार अधकचरी जानकारी रखने वाले लोग अनजाने में ग़लती कर बैठते हैं, लेकिन ये बात हम सभी को समझना जरूरी है।

VISHESH-ye ek copy paste kiya gaya lekh hai. uprokt nakaratmak baton k bad b wiki ka mahatv aur upyogita sanka rahit hai (angregi madhyam k liye ya aanshik roop se any madhyamon k liye) lekin sath me trutiyon se savdhan rahne ki b jaroorat hai.

ONLINE HINDI MAGAZINES

(1)- emagazine.pdgroup.in
(2)- yojna.gov.in
(3)- kurushetra

VISHESH- pd ko sirf online padha ja sakta hai aur antim dono ko download kiya ja sakta hai.

PRATHMIK PARIKSHA : DVATIYA PATR : SAMAGRI

1- tmh/unique/arihant me se koi ek kitab
2- upkar publication ki kitaben
3- r.s agrawal ki kitabe (avashyakta se adhik pathyakram aur gyan k star k karan seema rekha ka khayal rakhe)
4-upsc dvara li jane vali vastunisth parikshayon jaise nda, cds aadi k hal prashn patr
5- patrikayon (jaise pratiyogita darpan, safalta, arihant i next aadi) me diye jane wale vibhinn pratiyogi parikshayon k hal prashn patr jinki prakriti csat jaisi hai
6-samsamayik rajnitik, samajik, aarthik, paryavarniy, prashashnik aur rastriya mahatv ki ghatnao ki samajh. ye paroksh roop se labhdayak ho sakti hai.
7-bank po/clerk ki taiyari k.liye bazar me uplabdh kitabon aur bank po/clerk ki coaching samagri ka prayog b kiya ja sakta hai lekin pathyakram aur avashyak star me antar hone k karan seema rekha ka dhan rakhna chaiye.

VISHESH- ye samajhna sabse adhik mahatvapurn hai k samagri ki kami se nahi abhyas ki kami se hum asafal hote hai.

HINDI AUR ANGREGI MADHYAM : TAIYARI KI PRAKRITI ME ANTAR

1-pratyek angreji pustak ka hindi anuvad uplabdh na hone k karan dono madhyamo me kuch pustake saman hai aur kuch bhinn
2- samachar patr bhinn hai
3- patrikayen kuch saman aur kuch bhinn hai
4- internet sites kuch saman (sarkari) aur kuch bhinn hai
5- kai vishyon par ya to coaching notes uplabdh nahi hai aur agar hai b to gunvattayukt nahin hai. jaha tak mujhe pata hai sirf darshanshastr, itihaas aur hindi sahitya k notes ki gunvatta hindi madhyam me santosh janak hai. lekin inhe paryapt samajhne ki bhool katai na karen.

nischit roop se yadi angreji samagri ka prog hindi madhyam k saath karne me koi samasya nahi hai to ye ek vishesh labhdayak gun hai lekin main sudh roop se hindi madhyam ki jarooraton k anukul tathyon ka vishleshan karne ki koshish kar raha hoon kyunke hindi is desh ki matrabhasha hone k sath sath 65% se jyada logo ki bhasha hai aur angreji sirf 4% logo ki.

HINDI MADHYAM : GALATFAHMIYAN

1-hindi madhyam se civil seva paas karna namumkin ya bahut mushkil hai
2-bina coaching k safalta asambhav hai
3-angreji madhyam ki kitabon , samachar patron aur patrikaon ka adhyan anivarya hai
4-angreji me baat na kar pane k karan interview me jaroor fail kar diya jayega

yah saty hai k angreji madhyam k vibhinn srot hindi madhyam k sroto se adhik gunvattayukt hai aur ye is desh ki vyavastha ka ek bada nakaratmak pahlu hai lekin fir b hindi madhyam se b simit hi sahi lekin safalta k raste maujood hai. uprokt me se ek b kathan bhram k atirikt kuch nahi hai. inhe jitni jaldi tyag den utna behtar.

SEEMA REKHA (BOUNDRY LINE)

is bat par kafi jor diya jata hai aur charcha b hoti hai k kya kya aur kahan kahan se padna jaroori hai lekin is par bat na k barabar hi charcha hoti hai k kya kya padna jaroori nahi hai, jo k saman roop se mahatvapurn hai. ye ek tarfa najariya hume kafi nuksan pahuncha sakta hai. hume apni urja , samay, samasyaon aur lagaye gaye samay k anupat me milne wale labh ka hamesha dhyan rakhna chaiye. ek star par pahunch kar seeme rekha khinchna anivarya ho jata hai anyatha hum sirf ek ya kuch hisso ki taiyari me fanse rah jayenge aur any hisso ki kamjor taiyari ka kul yog par bhut bada nakaratmak prabhav padega. udahran:

samanya adhyan mukhya pariksha k adhunik itihas bhag ki taiyari k liye kitabon ki suchi is prakar hai-
1-adhunik bharat , ncert , class 12
2- swatantrata k liye bhartiya sangharsh, bipin chandra
3- kala aur sanskriti, spectrum
4- sumit sarkar, janjatiy aur nagrik vidrohon k liye
5-tarachandra, bhag (3 , 4)
6- gazetteer of india, bhag 2, kala aur sanskriti k liye

main is list aur b aage le ja sakta hoon lekin ye abhi se itni badi ho gai k avyavharik ban gai hai. maine apni seema rekha pahle teen binduyon tak seemit kar rakhi hai kyunki iske aage mujhe lagaye gaye samay k anupat me labh ka star ghatta hua najar aa raha hai jo nischit hi mujhe nuksan pahuchaega. yah bhag lagbhag 50 anko k liye pucha ja raha hai aur lagatar iska hissa kam hota ja raha hai. iska karan upsc ki paramparik vishyon k sthan par samkaleen vishyon ko adhik mahatv dene ki pravratti hai. is karan iske anko me badhottari hone ki gunjaish na k barabar hai. purane prasnpatron ko dekh kar main asani se andaja laga sakta hoon k pratham teen pustako ki madad se 50% anko ko hasil kiya ja sakta hai lekin lekin agle 20-30% anko k liye mujhe teen guna samay anya kitabon par kharch karna padega jabke isi samay avadhi me pathyakram k anya hisson se teen guna anko tak ki taiyari ki ja sakti hai. aise me agar main 10 se 20 anko k liye 50 anko ko gava doon to ye mera apne prati bada apradh hoga. yahi karan hai k meri seema rekha pratham teen pustakon tak seemit hai. humen kuch pane k liye kai bar kuch khona b padta hai aur yaha ye faisla ati mahatvpurn ho jata hai k hum kya khona aur kya pana chahte hai. aur yahi faisla hamari jeet aur haar ko nirdharit karta hai. lekin doosro ki nakal se b bachna chaiye har ek ki alag alag paristhitiyon k anusar uprokt ranniti ko lagu karne ki sthitiyan b alag alag ho sakti hain udahran k taur par itihas vishay ko lene wale abharti k liye uprokt puri suchi mahatvpurn ho sakti hai aur sayad vo uprokt niti ko bhugol (samanya adhyan) k sath aajmana pasand kare. kul mila kar apni seema rekha pahchanna pratyek abhyarti k liye anivarya hai.